John Dobson, afrigter van die Stormers, vrees dat sy Springbok-agtsteman, Evan Roos, ’n ernstige kniebesering opgedoen het in Vrydagaand se Verenigde Rugbykampioenskap-wedstryd teen Ulster in Belfast.
Roos moes die veld in die 23ste minuut verlaat in die Stormers se nederlaag van 5-35 in die Kingspan-stadion en was ná die wedstryd op krukke.
“Ek is nog nie 100% seker wat die omvang van die besering is nie, maar dis nie ’n kleine nie. Ek hoop net dit het nie ’n impak op sy ambisies op nasionale vlak nie. Ek sal verbaas wees as hy weer hierdie seisoen vir die Stormers speel,” sê Dobson.
