Seabelo Senatla kan straks vir die Stormers verligting op vleuel bring in Saterdag se Verenigde Rugbykampioenskap-wedstryd teen die Haaie in Durban.
John Dobson, afrigter van die Stormers, moes vir die afgelope naweek se wedstryd teen Ulster in Belfast ’n senter – Cornel Smit – op vleuel kies. Dit was omdat nie een van Senatla, Alapati Leiua, Angelo Davids en Leolin Zas oorweeg kon word nie. Die 19-jarige Suleiman Hartzenberg was die enige beskikbare vleuel vir die wedstryd teen Ulster.
Dobson het ná die nederlaag van 5-35 die afgelope Vrydagaand bevestig dat Senatla fiks sal wees. Die voormalige Blitsbok het op 24 September verlede jaar ’n borsspier geskeur in die Stormers se wedstryd teen Connacht in Stellenbosch. Hy is deur die Ierse ster Bundee Aki by ’n losskrum met die skouer geloop.
