Hoewel daar die afgelope paar jaar dikwels ’n donker prentjie geskep word oor die uittog van plaaslike rugbyspelers na die buiteland, meen die voormalige Springbokkaptein Warren Whiteley dit is nie noodwendig ’n slegte ding nie.
Whiteley (34), tans ’n hulpafrigter by die Haaie, is om kommentaar genader nadat die Durbaniete vandeesweek aangekondig het dat hulle die senter Rohan Janse van Rensburg gekontrakteer het.
Janse van Rensburg (27) het sedert 2018 vir die Sale Sharks in Engeland gespeel, nadat hy ’n staatmaker vir die Leeus was. Hy en Whiteley het destyds saam vir die Johannesburgers uitgedraf.
