Die Hoërskool Monument van Krugersdorp het met sy klinkende oorwinning oor die Hoërskool Waterkloof op ’n indrukwekkende wyse enige twyfel uit die weg geruim oor wie die toonaangewende span in Afdeling 1 van die Noordvaal-kompetisie in die aanloop tot die Julie-skoolvakansie is.
Monnas, wat tien drieë op die Ras van Rooyen-veld ingeryg en die Klofies se tjank met 64-15 afgetrap het, is sodoende steeds die enigste onoorwonne span in die kompetisie.
Dié wedstryd was aanvanklik vir die eerste ronde van die kompetisie gereël, maar Klofies moes hulle weens verskeie Covid-19-gevalle aan die kragmeting onttrek. Dit is toe tot die afgelope naweek uitgestel.
