Die Wimbledon-eindstryd tussen die aartsskurk van manstennis en ’n omstrede superster het die sentiment onder die kenners verdeel oor wie die trofee môreaand van die hertogin van Cambridge gaan ontvang.
Gaan Novak Djokovic sy sewende Wimbledon-titel inoes, of gaan manstennis se mees omstrede en in baie kringe ongeliefde speler – Nick Kyrgios – seëvier in sy eerste Grand Slam-eindstryd tot dusver?
Kyrgios het met sy talle uitbarstings op die baan, sy voorliefde daarvoor om rakette te vermorsel op ’n skaal wat selfs vir John McEnroe na ’n Sondagskool-onderwyser laat lyk, baie tennisaanhangers geïrriteer.
