Vanjaar was ’n waterskeidingsjaar vir basiese onderwys, skryf Michael le Cordeur.
Op die keper beskou is die feit dat ons daarin kon slaag om die skoolprojek te laat stabiliseer die beste nuus van 2022. Die omstrede rotering van klasse – ’n nagevolg van Covid-19 – het tot ’n einde gekom en leerlinge kon weer op ’n daaglikse grondslag onderrig ontvang by onderwysers. Roetine is belangrik vir die ontwikkeling van ’n kind. Drie jaar van rondlê by die huis was aanvanklik lekker, maar lekker is net ’n vinger lank.
Die gebrek aan buite-kurrikulêre aktiwiteite wat leerlinge te bowe moes kom tydens die inperking was die wortel van talle kwaad. Gelukkig is die sport- en kultuurprogram vanjaar hervat, wat ’n rustigheid oor leerlinge én die klaskamer gebring het. Die Russiese sielkundige Lef Wigotski (1896 – 1934) se teorie dat alle kognitiewe ontwikkeling die gevolg is van sosiale interaksie met ander (lees onderwysers en maats), is opnuut bevestig. Na dese kan niemand kan meer die rol van onderwysers vir doeltreffende onderrig ontken nie.
