In die toneelstuk Die Moeder slaan Sandra Prinsloo duike in jou hart met haar uitbeelding van ’n ma se rouproses wanneer haar kinders die huis verlaat. Willemien Brümmer skryf oor ’n nuwe soort leënessindroom.
Elize Parker het haar twee dogters “grootgemaak om die land te verlaat” – maar sy het nooit rekening gehou met die “verlatenheid en die swaarmoedigheid” wat haar sou tref die oomblik toe sy op haar eie woon nie.
Dié skrywer en joernalis, Huisgenoot se geliefde Liewe Elize wat vir sewe jaar lank altyd raad gehad het vir ander se verlies, kon vir die eerste keer in haar lewe nie skryf nie – ’n vonnis “erger as depressie”.
