Riviermondings is super-ekostelsels, ekonomiese kragsentrales en blou koolstofwasbakke wat baie meer aandag verdien as wat hulle kry, skryf Anusha Rajkaran.
Riviermondings hou vir die meeste mense nie die prestige of die romantiek in van die twee dele waaruit hulle bestaan nie: die riviere wat van een kant af vars water na hulle voer en die see wat van die ander kant af soutwater instoot nie.
Maar as die tussenganger tussen die rivier en die oseaan verdien riviermondings tog meer krediet. Hulle kan dalk dof en brak voorkom, maar huisves ’n rykdom van lewe. Riviermondings word pond vir pond as die produktiefste omgewings op aarde beskou en produseer klaarblyklik meer organiese stowwe as woude of graslande van dieselfde grootte. Omdat hulle weinig van die geweldige waterbewegings het wat met oseane en riviere geassosieer word, het hulle min roofdiere. Gevolglik bied hulle ’n veilige hawe vir tallose spesies voëls, visse en soogdiere.
