Volgens ’n onlangse verslag kry meer as een uit elke drie Suid-Afrikaners psigies swaar. Dis duidelik dat ons die stilte rondom psigiese siektes moet verbreek en moet práát – oftewel SpeakUP!, skryf Lizette Rabe.
Asof ons brose mensdom nie reeds swig onder al die aanslae nie. Daar is die hoofletter-boelies: Covid-19 en Klimaatsverandering en Misdaad en Korrupsie. En al die ander brutaliteite van ons tyd: geslagsgeweld, taxigeweld, bendegeweld. Plus voortslepende konflikte wêreldwyd.
En terwyl ons soos hasies in die hoofligte vasgevang is in al die verdoemenisse wat oor ons skerms rol, is ons nou ook getuies van ’n onwerklike konvensionele oorlog.
