Martie Koegelenberg van die Theewaterskloof-stadsraad probeer verduidelik dat Hermanus en Caledon nie met mekaar vergelyk kan word nie, en dat dit baie moeiliker is om Theewaterskloof se boeke te laat klop (27.09).
Ek verstaan nie hoe hierdie DA-beheerde stadsraad so swaar kry nie. Hulle het ’n gratis melkkoei wat hulle kan leegtap. Die Theewaterskloof-landgoed op die oewer van die Theewaterskloofdam is reeds in 1993 as ’n private dorp met ’n gholfbaan geproklameer, wat self op eie koste alle munisipale dienste moes lewer, terwyl dit ’n bate vir alle inwoners van die Theewaterskloof-distrik is.
Toe die ANC in 2003 beheer oor die stadsraad geneem het, het hulle ’n korting van 75% op munisipale belasting aan alle boere en grondeienaars van hierdie landgoed toegestaan omdat hulle besef het dat die munisipaliteit geen dienste aan hierdie instansies lewer nie. ’n Korting op munisipale belasting aan instansies wat geen munisipale dienste kry nie, word deur alle ander munisipaliteite, onder meer ook Overstrand, toegestaan.
