Na aanleiding van Dana Snyman se “Deurloop” in Saterdag (04:03) se Beeld wil ek simpatiseer met sy ondervinding op die st. 5-kamp.
Bangmaakpraatjies is nie die manier om godsdienstige gesprekke met kinders óf volwassenes te begin nie. Die resultaat kan vergelyk word met die saad wat op die oppervlakkige grond gesaai is, vinnig opgekom het maar net so vinnig weer weggekwyn het. Die wonderlike ligte gevoel wat gelowiges ervaar wat glo in Christus se verlossing van selfs die hardnekkigste sondes, is deur Sy genadegawe van die geloof blywend. Dit ten spyte daarvan dat daaglikse belydenis en aanhoudende vra om vergifnis van ons sonde steeds nodig is.
Die strewe om uit dankbaarheid, met die hulp van die Heilige Gees, al minder te swig voor die sondes, dra by tot die wonderlike ligte gevoel by dié wat geroep is tot dié geloof. Dana, ek vra om verskoning en vergifnis vir wat in st. 5 met jou en baie ander van ons gebeur het en steeds gebeur.
