Ek betreur dit dat enigiemand met die dood gedreig word oor sy standpunt: dit is onaanvaarbaar. Ek sal ook graag wil sien dat bekende sportmense wat standpunt ingeneem het oor BLM, met dieselfde openbare ywer standpunt inneem oor die talle onregverdighede wat in ons land gepleeg word teenoor ons mees kwesbare, meestal swart burgers.
Dink ’n bietjie aan die impak as daar voor ’n Solidarity Cup-wedstryd aangekondig word dat daar gekniel gaan word oor die toestand van die gesondheidstelsel in die Oos-Kaap, of oor die toestande waaronder soveel arm mense op ons dorpe moet leef, of die puttoilette by soveel skole, of oor hoe ons ouer arm mense deur Sassa behandel word.
Francois-hulle sal nou sê dit is juis hoekom hulle BLM ondersteun, maar dan moet hulle die boodskap baie duideliker oordra aan die mense wat iets kan doen omtrent die “black lives” in ons land wat “matter”, want ek is seker die politici dink die ondersteuning gaan oor iets wat in Amerika gebeur het.
