Gert van der Westhuizen (23.11) is van mening dat Suid-Afrika nou is waar oudpres. FW de Klerk destyds (1990-1994) was en hy vaar uit teen diegene wat De Klerk en almal wat destyds “ja” gestem het, as verraaiers uitmaak.
Ekself was ’n groot De Klerk-ondersteuner, maar het kort voor die 1994-verkiesing tot die besef gekom dat hy voor die linkse propaganda-aanslag geswig het deur ook al die goeie bedoelings van die beleid van afsonderlike ontwikkeling by die venster uit te gooi en slegs op die swak en lelike dinge te konsentreer wat by die uitvoering van die beleid plaasgevind het.
Van der Westhuizen propageer nou presies dieselfde foute wat De Klerk gemaak het. Die verskille tussen al die volke en kultuurgroepe in hierdie droewe land is so groot dat daar geen manier is wat ons een, gelukkige nasie kan word nie, behalwe as ons nie omgee om saam met die res oor die afgrond te stort nie.
