Ek kan my net indink hoe dit moet voel om as kind by die skool op te daag wetende dat jy nie die toilet kan gebruik nie weens die haglike toestand waarin dit is.
Dit is ’n skending van kinderregte soos uiteengesit in die VN se Handves vir Kinderregte. Duisende kinders sit in klaskamers met gebreekte vensters en water wat by die dak inloop. Die jare wat veronderstel was om die gelukkigste te wees, word ’n stryd en ’n vernedering.
Blykbaar was daar teikendatums in plek vir die vervanging van puttoilette. Ek neem aan begrotings is goedgekeur en aan spesifieke provinsies bewillig. Wat daarna gebeur het, bly ’n raaisel. Iewers langs die pad word ’n magdom vergaderings gehou en tenders toegeken. Sou dit nie miskien wyser gewees het vir die nasionale departement van onderwys om ’n taakspan saam te stel om die proses te monitor nie? Om verantwoording te gee vir elke sent wat bewillig word.
