Die woord koalisie was tot relatief onlangs toe een van hoop vir Suid-Afrikaners. ’n Nuwe politieke gonswoord wat beteken: “ ’n Haalbare alternatief vir die ANC.”
Sedertdien het heelwat gebeur wat die hoop, selfs in die optimiste se gemoed, laat beskaam het. Dit sluit die bedenklike sirkusse in wat in veral Gauteng se multimiljard-metroregerings afspeel. Onder meer veroorsaak deur doelbewuste ondermyningsaksies van die ANC, onstabiliteit in opposisiekoalisies en ’n gebrek aan integriteit in veral ’n swetterjoel klein partytjies.
Boonop is daar berigte dat die ANC ook nasionaal na koalisie-moontlikhede kyk en dat Paul Mashatile, nuwe adjunkpresident en Panyaza Lesufi, Gauteng se vuurvreter- premier, meen ’n ANC-EFF-koalisie is die toekoms. Dit bring vergesigte van Julius Malema as ’n toekomstige adjunkpresident.
