Dit was heerlik verfrissend om met ’n Vrystaatse matriekpresteerder te praat en oor haar geliefde stokperdjie, voëlkyk, te gesels. Chrismie Smith van die Hoër Meisieskool Oranje het al 400 spesies gesien en onlangs die vlermuisvalk, die breëbek en die rooiborslaksman afgemerk.
Voëlkyk gaan nie net oor ’n belangstelling in die wonderlikste en mooiste skeppings op aarde nie, dis om hiperbewus te wees van die wêreld om jou en fyn ingestel te wees op die natuur en die wêreld waarin ons leef. Die meeste kinders kan jou vertel oor hul influencers op TikTok en Instagram se koelste niksdoeners, maar kan nie tien spesies voëls in hul tuine identifiseer nie. Maar wat my bekommer, is dat ons samelewing nie kinders aanmoedig om meer bewus te wees van die natuurwêreld om ons nie.
Dit is nie net skole se plig om kinders in kontak te bring met die natuur nie, maar my kind wat in gr. 11 is, het in sy hele skoolloopbaan nog net een keer naby ’n dier gekom, en dit was toe hy ’n skerpioen op ’n Voortrekkerkamp moes eet. Vrywilliglik, darem, en gelukkig sonder die angel. Hy is op tientalle sporttoere per jaar wat duisende rand kos, maar was nog nie op een uitstappie na ’n reservaat nie, wat gratis behoort te wees.
