Dana Snyman: So lig het ek gevoel, so gou het ek geval

Ek het in st. 5 op ’n avontuurkamp die eerste keer tot bekering gekom.

Daar was net seuns op die kamp. Ons is in groepe verdeel en het in bungalows geslaap. Twee ooms was in beheer van ons: oom Tobie en oom Mike. Albei het weermagstewels gedra en het leerklappies oor hul horlosies gehad.

Bedags het hulle ons geleer hoe om met ’n kompas ’n roete deur die veld te volg. Hoe om die wilde vrugte uit te ken wat ’n mens kan eet. Hoe om in die nag dou in ’n plastieksak op te vang om te drink.