Verlede week het ’n storm in skrywers se teekoppies losgebars toe Romanza-skrywers, literati en resensente mekaar gepak het nadat ’n omstrede resensie in Rapport verskyn het oor Die Kontrak, die eerste in ’n nuwe Romanza Stoom-reeks. Erla-Mari Diedericks, skrywer van die boek, wonder of die bedryf nog onthou waaroor boeke eintlik gaan.
Verkeerde besluite en kafeïen. Soms dink sy dis al waaruit sy saamgestel is. Gelukkig lees mense graag oor al haar vuil wasgoed wat sy in die openbaar was. Erna Hendricks staan in haar pajamas en sluk haar antidepressante met haar derde koppie koffie vir die oggend af. Laat hy val waar hy wil.
As haar lesers haar nóú kan sien. Oud en oorgewig, besig om oorskietkos met vetterige vingers in haar mond te druk. Dié prentjie sal nooit op haar Facebook-blad verskyn nie. O nee. Daar is dit die ene glans. Sy is ’n handelsnaam! Seks, skandes en spanning verkoop tog, skat. Dan nie?
