Daar is ernstige gebreke in die Menseregtekommissie se verslag oor die skending van Afrikaanssprekende studente se regte by die Universiteit Stellenbosch. Boonop kan dit transformasie ondermyn, skryf Geo Quinot en Sandra Liebenberg.
Die Suid-Afrikaanse Menseregtekommissie (MRK) het in ’n verslag wat op 14 Maart uitgereik is, bevind die Universiteit Stellenbosch (US) het verskeie grondwetlike regte van Afrikaanssprekende studente geskend.
Dié bevinding is gegrond op sekere voorvalle wat in 2021 tydens die openingsweke van die akademiese jaar in ’n handjievol universiteitskoshuise plaasgevind het. Na bewering het studenteleiers in vier koshuise (uit altesaam 31) en een private studenteorganisasie (PSO) aan studente ’n opdrag gegee om slegs Engels tydens die verwelkomingsprogram van twee weke te gebruik.
