Dis al ’n irriterende gekerm: Ons het gedink Cyril Ramaphosa gaan ’n “sterk” president wees, maar hy is ’n besluitelose niksnuts.
Pleks dat hy soos Thabo Mbeki gatskop sodat sy teenstanders skuilplek soek die oomblik wanneer hy aankom. Nou word ons deur politieke hiënas soos Carl Niehaus en Tony Yengeni gekoggel.
Mbeki? Mbeki het saam met Tito Mboweni, Trevor Manuel, Alec Erwin en ’n paar ander vertrouelinge in die geheim ’n makro-ekonomiese beleidsdokument, Gear (Growth, Employment and Redistribution) geskryf. Sonder om enigiemand buite hul kringetjie te raadpleeg het Manuel dit in Junie 1996 aangekondig en begin afdwing.
