Van die Kaap tot in Gauteng ken ons hulle, die familie Pauw wat sedert die stamvader, die sendeling Jacobus Cornelis Pauw, ’n indrukwekkende bydrae tot die geskiedenis en kultuur van die Afrikaner gelewer het.
Kyk hierdie karaktertrekke wat die Suid-Afrikaanse Biografiese Woordeboek aan J.C. Pauw toeskryf: “Van sy vader erf hy ’n onbuigsame, eerlike karaktervastheid met ’n standvastige en oortuigende godsdienssin gepaard met ’n verbasende werkkrag, en van sy moeder innige vroomheid, beslistheid en opgeruimdheid.” Hiermee kan jy berge versit – en Pauw het.
Pauw is op 13 Desember 1837 in Leiden, Nederland, gebore. Hy het in Nijmegen ’n driejarige kursus vir sendeling-kwekelinge gevolg, waarna hy aan die Skotse Vrye Kerk in Amsterdam gestudeer het.
