André de Ruyter se boek waarin hy vertel van sy tyd by Eskom gaan mense seker vir die volgende paar dae aan die praat hou, totdat die een of ander “bom” dit van die nuusagenda afstoot.
Dis mos hoe ons in Suid-Afrika leef: van die een “skokkende onthulling” tot die volgende. Iets gebeur, en dan tree die regering se kommunikasiemasjien in werking en produseer verklarings met duisende sinlose woorde en nuuskonferensies met ure se pratende koppe oor die onderwerp. En dan is dit die einde van die storie.
Soos verlede week, toe die VSA se ambassadeur in Suid-Afrika, Reuben E. Brigety, gesê het Suid-Afrika het wapens aan Rusland verskaf. “Kaboem!” hoor jy die bom bars. En vir die volgende drie dae word al wat ’n minister en ’n woordvoerder is ontplooi om die VSA en sy ambassadeur, wat duidelik níks van protokol verstaan nie, op sy plek te sit.
