Verskillende beelde, gedagtes en ervarings word opgeroep deur 27 April 1994.
Dit is dalk weer tyd om te vra wat ons met hierdie historiese moment en sy effek(te) moet maak? Dit is immers reeds 29 jaar ná die 1994-moment – ’n oomblik wat die kulminasie was van lang en pynlike prosesse en wat diepgaande verandering op alle vlakke van ons lewens as Suid-Afrikaners tot gevolg gehad het.
Ek herinner my aan ’n onlangse gesprek met voormalige werknemers van die Instituut vir Demokrasie in Suid-Afrika (Idasa) – ’n organisasie wat ’n deurslaggewende rol in ons politieke oorgang gespeel het, maar wat reeds vir ’n hele paar jaar nie meer bestaan nie. Die gesprek het plaasgevind omdat die volledige Idasa-versameling en argief nou by die Universiteit Stellenbosch (US) geberg word. Dit is uiteraard ’n skat vir navorsers en nuuskieriges.
