Jody Scheckter, wie se prestasies as Formule Een-renjaer in die 1970’s steeds deur talle mense onthou word, het gister 73 geword. Maar ’n Duitse renjaer wat 50 jaar voor Scheckter die wêreld van motorwedrenne oorheers het, is deesdae grootliks vergete. Sy naam was Rudolf Caracciola, en hy is op 30 Januarie 1901, vandag 122 jaar gelede, gebore. Albe Grobbelaar het gaan lees oor een van die wedrenne wat Caracciola nooit sou vergeet nie.
As ’n mens in sy latere lewe vir Caratsch (soos die Duitsers hom genoem het), die man wat in die 1930’s nie minder nie as 17 wêreldrekords verbeter het, sou vra watter wedren hy die beste kon onthou, sou hy baie gou wees met sy antwoord. En dit sou nié een van die talle Grands Prix of tydrenne wees wat hy gewen het nie. Nee, Rudolf Caracciola sou terugdink aan ’n dag in 1932 toe hy verlóór het.
Dit was in die Duitse Grand Prix op die Avus-baan in Berlyn. Op 21 Mei 1932, die Saterdag voor die wedren, is ’n nuwe rekordtyd in die oefenrondtes opgestel toe Hans Stuck in ’n Mercedes teen ’n gemiddelde snelheid van meer as 200 km per uur om die baan gejaag het. Tog was Caracciola baie seker daarvan dat hý die volgende dag sou wen. Daar was by hom geen twyfel dat die slanke Alfa waarin hy gejaag het, die lompe Mercedesse onder die stof sou ry nie. In die pylvak kon die agtsilinder Alfa tot 240 km/h haal.
