Ope brief aan Cyril Ramaphosa: ‘Jy breek my hart, maar ek bly hoop’

Daar was ’n tyd toe sy hom tot heilige verhef het, maar die groot fees van hul liefde is verby. Willemien Brümmer skryf ’n openhartige brief aan pres. Cyril Ramaphosa.

Liewe Cyril

Ek het lank gewik en geweeg of ek vir jou moet skryf, want daar is ’n sekere arrogansie en breedsprakigheid aan ope briewe. Ek weet ook ek behoort jou as “meneer die president” aan te spreek, maar hierdie voel meer na ’n binnekamer-gesprek – so veroorloof my asseblief die poëtiese vryheid.