My Nuwejaarsvoorneme is om minder bevooroordeeld en stiksienig te wees – oper vir nuwe idees en om te leer van ander.
Dis met hierdie voorneme in gedagte dat ek deesdae hard probeer om my jonger huisgenote se liefde vir rap en hip-hop te verstaan. Daarom luister ek en vra uit. Dis moeilik. Maar ook insiggewend.
So vind ek die afgelope week uit dat die “beste song ooit” ’n nommertjie is met die titel “No Role Modelz” deur J. Cole. (Ja, ek het seker gemaak, volgens my kenner en raadgewer is die beskrywing “beste song ooit” geen hiperbool nie. Dit is onbetwisbaar en ongetwyfeld die musiekhoogtepunt sedert die moderne era in 1954 ingelui is met Elvis Presley se “That’s All Right Mama”).
