Hoekom is ons in Suid-Afrika so lief daarvoor om moeilike vrae óf te ontduik óf te probeer beantwoord met oorvereenvoudigde antwoorde?
Waarom is ons so dikwels uitgelewer aan slimjan-kommentators en politici wie se kitsoplossings net illustreer dat hulle nie die kompleksiteit van die probleem verstaan nie?
Die lawaai oor Stellenbosch se besluit om sekere manskoshuise oop te stel vir vroue is ’n goeie voorbeeld. Aan die een kant die tradisionaliste wat hoog opgee oor ’n “koshuiskultuur” wat oor dekades ontwikkel het en aan die ander kant diegene wat reken die antwoord is eenvoudig: Daar is veel meer vroue as mans wat koshuiskamers soek, so skop die manne uit die bed.
