‘Dit verbluf dat die Wes-Kaapse polisiediens voortgaan met ’n verengelsingspoging wat reeds in die Noord-Kaap ná ’n draai in die hof in die stof gebyt het.”
So sê dr. Conrad Steenkamp, hoof van die Afrikaanse Taalraad, ná ’n berig (DB 11/3) waarvolgens die Wes-Kaapse SAPD weier om nie-Engelse dossiere van polisiekantore te aanvaar. Alle verklarings en dokumentasie moet blykbaar in Engels wees, ongeag die taal of tale van die betrokkenes.
Dr. Zakeera Docrat, ’n forensiese taalkundige aan die Universiteit van Wes-Kaapland wat navorsing oor meertaligheid in die polisiediens en regsisteem doen, sê die negatiewe gevolge van die SAPD se taalbeleid word nou stadig maar seker sigbaar.
