Gedurende die Kodesa-onderhandelinge in die vroeë 1990’s het die ANC daarop aangedring dat ’n toekomstige Suid-Afrika ’n unitêre staat moet wees. Voorstelle van die Nasionale Party (NP), die IVP en Demokratiese Party vir ’n meer gedesentraliseerde regering is sterk teengestaan.
Die ANC was gekant teen ’n land waar groepe – stamme of verskillende rasse – hul eie sake bestuur omdat dit die doel van ’n verenigde, nasionale nierassige en nieseksistiese land sou ondermyn. Hy het weggedoen met tuislande soos Ciskei, Bophuthatswana en Venda en daar is uiteindelik ooreengekom op nuwe provinsies, wat maar min magte gekry het. Dit lyk wel nou of die nasionale projek baie stadig afgebreek gaan word.
Die ANC-regering het die land in die afgelope 28 jaar wanbestuur, wat gelei het tot die ineenstorting van talle dienste. Die grootste krisis is kragvoorsiening. Die Kaapstad-metro gee nou die pas aan met ’n projek om inwoners se totale afhanklikheid van Eskom en die ongerief van beurtkrag te verminder.
