Wat vorm ’n mens se idees oor mans wat juwele dra, wonder Rudi Swanepoel.
Daai outjies by die see het altyd vir my so cool gelyk. Ek sou eers veel, veel later in my lewe besef hoe ek hulle sou kón beskryf: Hulle het tuis in hul velle gelyk.
Dit was hier by 1984, 1985. Ons was bevoorreg om rofweg een keer per jaar Durban (later Margate en Uvongo) te besoek. Dit was draairoomys- en sonroomdae wat nou soet en dan soos klapper geruik het. Ons het soggens opgepak (járre se werk om alles reg te kry, het dit gevoel) om strand toe te gaan, grafies en emmertjies gehad en ek het raas gekry (net een keer) omdat ek nie behoorlike toestemming gevra het om my suster in haar costume af te neem nie.
