Artikels oor trooskos was veral met die eerste streng grendeltyd volop in die media. Lasagne met smelt-in-die-mond-witsous, bobotie met vreeslik baie Mrs Ball’s, souskluitjies en sagopoeding. Alles met regte room, baie botter en konkoksies wat lekkerder as lekker is.
Huisgebonde per wet en vol selfbejammering, eksperimenteer ek met resep ná resep. Dit werk. Dit troos. Hoe meer suksesvolle smulgeregte ek maak, hoe beter voel ek. Darem iets wat die wet en die politici nie van jou kan weerhou nie. Dit versag die vuishou en skok van die landwye miserabelheid wat dreig om almal in te sluk.
Maar anders as op sigaretpakkies waar jy ingelig word oor die gevare van nikotien, kom die resepte sonder waarskuwings. En met dié dat jy nêrens heen mag gaan om oefening te kry nie, pak die vetrolletjies stadig maar seker aan.
