Elias le Riche is die vierde parkhoof van die Kgalagadi-oorgrenspark met dié van. Hy het 60 jaar gelede die reusetaak aangepak om die Nossob-kampterrein in die noordelike deel van die park te ontwikkel.
Sedertdien was hy parkhoof, navorser, leeuvanger, bouer, vlieënier, hersteller van wild- en leeugetalle en noodgedwonge ook dokter en tandetrekker.
Verhale uit die 82-jarige Elias se kinderjare in die destydse Nasionale Gemsbokpark val vreemd op die oor. Dis stories van kameelvet en stroop op brood, troupantkuikens grootmaak met akkedissies en skerpioene, die aand toe 17 leeus skielik rondom hul kampvuur dreig nadat hy en sy ouer broer Stoffel flussies nog in die rivier gespeel het.
