Veterane van die Grensoorlog moet nie net hul eie stories vertel nie, maar dit is baie belangrik om ook te luister na dié van ander, het Deon Lamprecht aan Gert van der Westhuizen gesê oor sy nuwe boek met die veelseggende subtitel: ‘Na die hel en terug in Angola.’
Deesdae verskyn daar gereeld boeke oor die 23 jaar lange Grensoorlog wat al meer as 30 jaar gelede geëindig het. Nie almal sal lank onthou word nie. Die brug (Delta Boeke), Lamprecht se tweede boek oor die Grensoorlog, is egter een wat jou sal dwing om dit ’n tweede keer te lees of aan iemand te gee wat graag wil weet wat gewone soldate destyds in dié stryd deurgemaak het – en vir hoe lank hulle daarna nog worstel met die onthou wat hulle nie wil los nie.
Dit is nié ’n boek waarin die generaals en politici aan die woord is om hul strategieë en planne van destyds te probeer verduidelik nie. Dit preek nie en dit veroordeel nie, hoewel dit ’n mens onvermydelik laat met ’n gevoel van die futiliteit van oorlog.
