Marlin Gertze het Saterdag vir Botla Fire se tweede en derde spanne op hul tuisveld teen Villagers uitgedraf. Ure later is hierdie jongman drie keer koelbloedig geskiet terwyl hy en van sy spanmaats by ’n smokkelhuis wou drank koop.
Die 25-jarige Gertze het volgens berigte daarin geslaag om te vlug en skuiling te soek, maar is in onbekende mense se erf, waar hy inmekaargesak het, dood. Sy lewelose liggaam is glo die volgende oggend ontdek. Melvin Davids, voorsitter van Botrivier-rugbyklub, sê Gertze se dood het sy spanmaats baie hard getref. “Hulle was ’n baie hegte groep en dis waarom hulle die aand ná die wedstryd teen Villagers van Worcester nog saamgekuier het. Almal het Sondagoggend by die plek byeengekom waar hy gevind is. Die manne was baie emosioneel, maar ons kon daarin slaag om hulle te kalmeer,” het hy bygevoeg.
Davids het Gertze beskryf as ’n goeie utility-speler wat nie net as slot nie, maar ook as flank of senter uitgedraf het.“Hy was ’n kranige en lojale speler wat elke oefensessie daar was en nog nie een wedstryd gemis het nie,” het Davids gesê. Die rugbyklub hou Woensdag 15 Maart omstreeks 19:00 ’n spesiale herdenkingsdiens vir Gertze by die Botrivier-rugbyklub se klubhuis.Kapt.
Fadila September, ’n woordvoerder van die polisie in die Overberg-distrik, het bevestig beamptes van die Caledon-polisie het Sondagoggend omstreeks 00:45 op ’n klagte oor ’n skietery en bakleiery in Fynbosstraat, Botrivier, gereageer.“Die motief vir die skietery is nog onbekend. Dit is ook nie bekend hoeveel skieters betrokke was nie.“Die moordondersoek duur voort. Niemand is nog in hegtenis geneem nie,” het September gesê.
