Ons gemeenskap is nou behoorlik vuisfoos vir beurtkrag, en dan boonop die swak wyse waarop ons munisipale bestuur beurtkrag die afgelope jare bestuur.
Bel die munisipale kantore tydens beurtkrag – of soms selfs wanneer dit nie beurtkrag is nie – en jy kry nie antwoord nie.
Talle baie belangrike verkeersligte is steeds buite werking wanneer beurtkrag geld. Neem nou net Arboretumrylaan se aansluiting by die Paryspad – hierdie pad is deesdae een van Paarl se besigste, maar by hierdie baie belangrike lig is nie eens ’n verkeersbeampte tydens beurtkrag nie.
Waar het die Drakenstein-munisipaliteit ook begin met sonkraginstallasies? Sover ek weet, nêrens, en dit is veronderstel om ’n uitmuntende stad te wees.
En dan – iets wat my heeltemal verbyster laat, is dat ons soms tot 12 uur lank beurtkrag op ’n dag het, maar die munisipaliteit dink dit nog goed om ons warmwatersilinders af te skakel. Dit is absurd, om die minste te sê!
Dan wil ek nie eens dink aan hoe erg die munisipaliteit ons in die begroting gaan straf met verhogings vir elektrisiteit, erfbelasting en ander nie.
Dit is tyd dat ons ons stemme dik maak teen die fat cats wat reuse-salarisse verdien en blink motors ry terwyl die vallei net verval en krepeer.
