“Die regering se eerste prioriteit is om die infrastruktuur-uitdagings wat in al ons dorpe bestaan, aan te spreek, en as ’n beginpunt fokus ons op Kimberley,” het die premier van die Noord-Kaap, dr. Zamani Saul, Donderdag (02/03) tydens sy provinsiale rede gesê.
Na aanleiding van verlede week se foto oor ontblote stormwaterslote en mangate sonder deksels in die gedrukte NoordkaapBulletin, en ’n reeks foto’s daaroor op die koerant se Facebook-blad, het lesers van talle dorpe duidelik laat blyk dat hulle dié en soortgelyke beloftes van die verlede nie vertrou nie.
“Warrenton lyk haglik en al twee weke waterloos met Vaalrivier wat deur die dorp loop,” skryf Rudolph Potgieter.
Oor Olifantshoek skryf Frank Titus: “Water shortages for weeks. Drains overflow. No post office to renew licence disc. Drug addicts that don’t sleep trying to steal from you. Hospital that has no nurse sometimes.”
“Hopetown lyk sleg ons sit nou al drie dae sonder water. 15 000 mense woon hier die helfte in sinkhuise,” laat weet Ansa Wiid DeWet, wie ook sê dat die dorp nie ’n poskantoor of lisensiekantoor het nie.
Johanna Hugo sê Philipstown het ’n spookdorp geword, met dwelmhandelaars wat oorvat.
George van den Heever sê Postmasburg is die vuilste dorp.
Gert Eiman skryf: “Rietfontein en omliggende dorpe sit met ’n hoë werkloosheidsyfer. Loubos buite Rietfontein is nou al vir jare sonder ’n kliniek. Behuising is ook ’n probleem en ATM’s kort in Rietfontein.”
Charlotte Jansen van Vuuren merk op dat mangatdeksels gesteel word om by skrootwerwe te verkoop.
Jeff van Neel sê diegene wat sê dat hulle te veel kla, moet self kom kyk want Namakwa stort ineen.
“Kyk hoe lyk Daniëlskuil se paaie in die woongebied van Kuilsville. Dis tragies,” sê Barbara Struis-Geduld.
Oor Victoria-Wes sê Sophia Beginsel: “Kom kyk self want as ek nou begin dan skryf ek ’n boek van Victoria-Wes.”
“Die ergste is Kimberley is die hoofstad van die Noord-Kaap maar kyk hoe lyk ons dorp,” merk Amelia Hayman op.
