’n Vyf-en-dertig-jarige man van Upington wat die gemeenskap van die dorp as te ware terroriseer het, is verlede week tot 22 jaar tronkstraf gevonnis vir klagtes van verkragting, inbraak en diefstal.
Tydens die hofverrigtinge in Upington het die hof gehoor dat Floors Johannes Matthys die gemeenskap met huisbrake, diefstal en in sommige gevalle die verkragting van slagoffers terroriseer het.
Sers. Timothy Sam, mediawoordvoerder, sê die polisie se ondersoek het daartoe gelei dat die hof 15 jaar direkte gevangenisstraf vir verkragting, en sewe jaar vir vyf aanklagte van huisbraak en diefstal aan Matthys opgelê het.
Die ondersoekbeampte, speursers. Shahieda Williams, is vir haar aandeel om hierdie misdade in die gemeenskap stop te sit, geprys.
- Intussen het lede van die polisie verskeie suksesse met Operasie Vuthu Hawe behaal wat vanaf Donderdag 18 Mei tot Sondag 21 Mei plaasgevind het. Altesaam 100 verdagtes is vir verskeie misdade in hegtenis geneem.
Deel van die sukses was die inhegtenisneming van twee manlike verdagtes, onderskeidelik 54 en 47 jaar oud, vir die besit van 119 kg Eskom-koperkabels in Douglas. Die voertuig wat in die uitvoering van die misdaad gebruik is, is gekonfiskeer, sê lt.kol Sergio Kock, mediawoordvoerder.
Tydens die operasies is verdagtes oor die Noord-Kaap heen in hegtenis geneem vir misdade insluitend 20 sake van handel in dwelms, verskeie vir aanranding met die doel om ernstig te beseer, aanranding, roof, besigheidsinbraak, diefstal uit motorvoertuie, opsetlike saakbeskadiging, dronkenskap, oproerige gedrag, algemene diefstal, en die besit van vermoedelik gesteelde eiendom. Ongedokumenteerde persone is ook in hegtenis geneem.
Beslag is ook gelê op tik, Mandrax-tablette, dagga, alkohol en gevaarlike wapens.
Tydens die operasie is 30 padblokkades en voertuigbeheerpunte opgestel waartydens 4 258 persone en 2 155 voertuie deursoek is. Talle boetes is vir verkeersoortredings, oproerige gedrag en dronkenskap in die openbaar uitgereik.
- In Prieska het lede van die sigbare polisiëringseenheid ’n verdagte vasgetrek ná ’n inbraak in Du Toitstraat in die dorp.
Lt. kol. Sergio Kock, polisiewoordvoerder, sê die polisielede het op Sondag 21 Mei inligting opgevolg en die man in hegtenis geneem.
Elektriese toerusting met ’n waarde van R16 000 is in sy besit gevind. Dit het ooreengekom met die toerusting wat as gesteel aangemeld is ná ’n onlangse huisinbraak.
Die verdagte sal binnekort in die Prieska-landdroshof verskyn.
