Beurtkrag, dreigende eendeweer, watertekorte en sprake van ’n protesoptog wat kleedrepetisies sou ontwrig, het die bekroonde skrywer en filmmaker Eric R. Kok nie stopgesit om sy nuutste verhoogstuk Lena se Lot onlangs in Roodepan op te voer nie.
Kok het nege jaar gewag voordat hy dié verhoogdrama op 25 Februarie by die Hoërskool Pescodia kon opvoer. Die drama-opvoering het lewendige musiekuitvoerings deur Sylvester Oliphant en Uranium 238 ingesluit. Die opvoering is deur Barnard Hoogstander saamgestel.
Lena se Lot is die verhaal van ’n ambisieuse jong model wat liefde bo haar loopbaan kies. Aanvanklik verblind deur liefde, sal sy uiteindelik die man van haar drome sien vir wat hy werklik is.
Die storie het voorheen baie volgelinge en aanhangers op sy Facebook-blad Roodepan Stories gehad.
Kok het in 2022 suksesvol aansoek gedoen vir befondsing by die Nasionale Kunsteraad.
“Ons is oneindig dankbaar teenoor die kunsteraad, AGS kerk Roepersfontein, Hoërskool Pescodia, Beauty and the Bull Produksies vir die klank, Shidokwon Academy, Kaneezah Printing, en Kimberley Clothing vir hul bydrae. Ook spesiaal dankie aan my gemeenskap en my ma wat my altyd ondersteun.”
Oudisies het in November plaasgevind en die jong aspirant-akteurs is almal uit Roodepan gekies. Kok en sy span het dadelik dramawerksessies en repetisies by die AGS kerk Roepersfontein in Roodepan gehou.
“Op die groot dag is daar gespook met finale voorbereidings en minute voor die opvoering sou begin, was die produksiespan senuweeagtig. Ek het almal bymekaar geroep en moed in gepraat en gebid dat God die aand seën.
“Dit was hulle se eerste opvoering. Ek is baie trots op die akteurs en verhoogspan wat hul beste gelewer het. Die gehoor was so vasgevang dat toe beurtkrag toeslaan, het hulle vasgenael bly sit. Ander het selfs lig vir die akteurs met hul selfone verskaf.
“Ons het voorsorg getref en ’n kragopwekker byderhand gehad, maar die kragtoevoer het vroeër afgegaan as beplan. Na ’n oomblik van paniek kon ons die kragopwekker aanskakel. Die samewerking en gehoor wat in die donkerte bly sit het, het trane na my oë gebring.
Een van die lede in die gehoor, Robin Joubert sê: “Die vertoning was goed en Lena was my gunsteling karakter. Ek hoop Eric-hulle voer ’n drama elke kwartaal op opoor naweke wanneer mense salaris gekry het en hul geld eerder op kuns en kultuur kan bestee wat gemeenskapsprobleme onder die soeklig plaas.”
Sharifa Schoeman het gesê dit was ’n inspirerende boodskap vir baie jong meisies, terwyl Lesley Jacobs gesê het die opvoering was “motiverend en kragtig“.
Kok het reeds ’n bekroonde vollengte fliek, Liesbet, en ’n dokumentêre prent, Breaking Barriers – The Fitzpatrick Story, vervaardig.
