Een persoon is dood en vyf ander is beseer in ‘n motorongeluk Dinsdagoggend (23 Mei). Die ongeluk het kort ná 08:00 op die hoeke van Plattekloofweg en Rothschild Boulevard - enkele meters vanaf die Mediclinic Panorama - plaasgevind.
TygerBurger het vroeër berig hoe ‘n Ford-bakkie, ligte vragmotor en ‘n sportsnutsvoertuig teen mekaar gebots het. Die bakkie het teen ‘n kontroleboks van ‘n stel verkeersligte gebots en dit beskadig. Die boks is reg voor die Northlink-kollege.
Die polisie, Stad Kaapstad se brand- en reddingsdienste, sowel as nooddiens ER24 was op die toneel.
Russel Meiring, ER24-woordvoerder, het bevestig dat een man dood is en vyf ander beserings opgedoen het. Volgens Meiring was daar ses manspassasiers in die bakkie. Een van die passasiers was in ‘n kritieke toestand, die res het geringe beserings opgedoen.
“Medici het die pasiënte behandel en ook lewensondersteuning aan die kritieke man verskaf. Ná die behandeling is die pasiënte na nabygeleë hospitale vervoer vir veredere behandeling. Met hul aankoms by die hospitaal is die kritiekbeseerde man aan sy beserings dood,” volgens Meiring.
Die ongeluk het erge drukverkeer tydens spitstyd veroorsaak.
