Christine Bam, bekende mezzosopraan van Kuilsrivier en lid van die Kaapstad Operakoor, het onlangs nog ’n toekenning opgeraap.
Christine is in die Klassieke Musiek- sangafdeling van Fine Music Radio (FMR) se beursfondskompetisie as wenner aangewys. Die eindronde het op Woensdag 10 Mei by die Baxter-teater plaasgevind.
Die kompetisie is in 2009 deur die Rolf-Stephan Nussbaum-stigting begin om studiebeurse en toekennings aan studente in uitvoerende kunste of musiek te maak. Daar is vier afdelings om die beste talent in klassieke musiek (sang en instrumentaal), jazz en Afrika-musiek te beloon.
Volgens FMR was die standaard van die kompetisie weer eens van hoogstaande gehalte, wat die beoordelaars se taak om wenners in die onderskeie afdelings aan te wys, bemoeilik het.
Christine sê sy is baie dankbaar vir FMR en die Rolf-Stephan Nussbaum-stigting vir die geleentheid wat die kompetisie bied, asook hul volgehoue ondersteuning aan kunstenaars.
“Ek moet ook my stemafrigter, Violina Anguelov-Hobbs, bedank,” sê sy.
Haar indrukwekkende repertoire in die kompetisie het werke van Massenet, Mozart, Saint-Saëns en Johann Strauss ingesluit.
Sy is in die eindronde deur dr. Lisa Engelbrecht op klavier begelei.
Christine het vroeër vanjaar die tweede plek in die Vriende van Opera in Kaapstad se beurskompetisie, wat ook by die Baxter aangebied is, behaal.
Sy het ’n BMus-graad aan die Universiteit Stellenbosch verwerf en is tans ’n nagraadse student aan die Universiteit van Kaapstad se Operaskool.
Sy was onlangs in die koor vir Die pêrelvissers en gaan later vanjaar in nog twee Kaapstad Operaproduksies – Tosca in September en La Traviata in Oktober – by die Kunstekaap-operahuis optree.
Die eindronde van die FMR-kompetisie se klassiekemusiek-afdelings (instrumentaal en sang) word op Sondag 4 Junie om 14:00 op dié radiostasie uitgesaai.
