Misdaadvoorkomingsbeamptes wat strategies geplaas is om grypdiewe in Bonteheuwel te vang, het verlede week vinnig ingespring en ’n bendegeveg gestop.
Dié groep, wat langs Jakes Gerwelweg gestasioneer is, het gesien hoe twee strydende bendes mekaar met klippe begin gooi.
Volgens sers. Samantha Adonis, polisiewoordvoerder, het die beamptes gesien een van die bendelede gaan op sy knieë en wys iets in die rigting van die ander groep. “Die beamptes het hulle na die toneel gehaas en die verdagte het weggehardloop. Die beamptes het hom tot in ’n nabygeleë eiendom in Turksvyweg gejaag, waar hulle hom in hegtenis geneem het,” sê Adonis.
Sy sê die 32-jarige verdagte was in besit van ’n 9 mm-pistool. “Daar is gevind dat die vuurwapen verstop was en dit is die rede hoekom ’n skoot nie afgegaan het nie. Was dit nie vir die spoed waarmee die beamptes opgetree het nie, sou daar beslis lewensverlies gewees het. Ons wil die beamptes bedank vir hul flink diens,” sê sy.
In ’n voorval verlede week het die Ravensmead-polisie ’n verdagte weens handel in dwelms in hegtenis geneem.
Volgens kapt. Odwa Makapula, polisiewoordvoerder, het die misdaadvoorkomingseenheid inligting ontvang dat dwelms by ’n sekere huis in Erika-landgoed verkoop word. “Beamptes het die inligting opgevolg en die huis gaan deursoek. Die beamptes het 76 heel Mandrax-pille, 13 pakkies dagga, 67 pakkies tik, en 22 tiklollies by ’n 63-jarige verdagte gevind,” sê Makapula.
