Die Primrose RVK van Worcester het Saterdag (18 Februarie) ’n vriendskaplike wedstryd teen Goudini United gespeel en naelskraaps met een punt (20-19) teen Goudini verloor.
Die wedstryd het teen ’n vinnige pas begin en pragtige rugby opgelewer, wat die skare behoorlik vermaak het.
Ten spyte van die bloedige hitte het die rugbyspelers – soos die telling ook aandui – nie vir mekaar teruggestaan nie. Teen rustyd was die twee spanne gelykop met sewe punte elk.
Die wedstryd is ná halftyd hervat en dit was veral die twee spanne se voorspelers wat mekaar die stryd aangesê het. Die agterspelers het ook nie op hulle laat wag nie, en aan spoed was daar geen tekort nie.
Goudini het later nog twee drieë gedruk en ook ’n strafskop oorgeklits, wat dié span se telling op 20 punte te staan gebring het.
Primrose het immers ook nie op hom laat wag nie en ook twee drieë aangeteken, waarvan net een verdoel is, wat die eindtelling op 20-19 vir Goudini te staan gebring het.
