Op 1 Junie 1940 het Eric en Nancy Kingston getrou. En agt dekades later kon die gelukkige paartjie hul 80ste huweliksherdenking vier. 

Eric, wat reeds 100 is, soen steeds elke oggend sy vrou en hou haar hand vas. “Ons is steeds verlief,” het Nancy, wat 100 in Oktober word, aan die BBC gesê. Dís glo die geheim vir hul gelukkige huwelik.

Die paartjie, wat in Blackheath, Engeland, woon, is die trotse ouers van vyf kinders. Hulle het ook 11 kleinkinders, 28 agterkleinkinders en 14 agter-agterkleinkinders. 

In 1938 het Nancy haar broer oorreed om ’n afspraak tussen haar en Eric te reël. Die ontmoeting het op ’n brug plaasgevind en sedertdien was hulle onafskeidbaar.

Die Covid-19-pandemie het veroorsaak dat hul kinders en familie nie saam kon vier nie. Maar Stephan, een van die paartjie se kinders, sê sy ouers het nog altyd ’n jonk-van-siel-houding gehad. “Hulle bly op hoogte van als, hulle kom jonger voor as wat hul is.”

Nóg goedvoel-storie:

Kleuterskool-lieflinge trou ná 20 jaar

Op drie het Matt Grodsky voor sy kleuterskoolklas aangekondig hy gaan eendag met sy maatjie Laura Scheel trou. Die kinders het uitgebars van die lag, maar Matt het net geglimlag. "Wag net, julle sal sien," het hy destyds gesê. Nou, 20 jaar later, is die paartjie van Phoenix, Arizona, sowaar getroud!

Matt en Laura FOTO Instagram / Matt Grodsky

Hierdie storie, wat in 2017 gepubliseer is, bly een van SARIE.com se gewildstes - lees dit hier.