Hier en daar het hul name opgeduik, mettertyd ál meer. Maar eensklaps is dié drie aktrises bekend, elkeen besig om hul stempel af te druk en hulle stewig in ons vermaakwêreld te vestig.

Vir jare geniet ons die werk van ons bekendste en talentvolste akteurs – daardie mense wat in ons hart kruip, ons bly verras en beïndruk, later legendaries word. Nooit kan ons dink dat ander hul plek sal inneem nie, en dan, op ’n dag, word jy bewus van nuwe name, nuwe talent wat ontluik en ál meer gehoor en gesien word. Dís waar die aktrises Trix Vivier, Jawaahier Petersen en Mila Guy hulle nou bevind – elkeen besig om op hul eie manier te wys watter talent hulle het en indruk te maak, ten spyte van die onvoorspelbare tye waarin werk skaars is . . . Hulle is op pad boontoe, en mense neem kennis.

Mila Guy, Jawaahier Petersen en Trix Vivier is die voorbladsterre van SARIE se Mei/Julie 2021-uitgawe. FOTO Leana CR

Mila Guy gesels

Jy het al gesê toneelspel laat jou vergeet van die regte wêreld. Is dit deels ontvlugting?

Toneelspel gee my die kans om net in die oomblik te wees, sonder om om te gee wat enigiemand van my dink. Ek kan net myself wees, sonder om ’n front voor te hou. Net ek – nie ek en die samelewing se verwagtinge van my nie. Jy gebruik jou verstand die aand vooraf om jou woorde te leer, ja, maar as jy daar is, kom dit uit jou maag – alles is ’n reaksie op die oomblik. Jy kan net wéés en dis so bevrydend.

Was die drang om hier toneel te speel sterker as die verlange toe jy jou familie in Nieu-Seeland agterlaat?

Ek het glad nie so daaroor gedink nie. Ná my eerste jaar as dramastudent aan die Universiteit van Auckland wou ek vir ’n jaar in Suid-Afrika kom studeer, aan die Universiteit van Pretoria, want ek het gevoel ek mis uit op die studentekultuur. Toe ontmoet ek ’n ou en besluit om langer te bly. Die liefde doen mos maar vreemde dinge! En toe kry ek in my finale jaar ’n rol in Binnelanders. Hier is ek nou al amper tien jaar in Suid-Afrika en my ma vra my steeds elke jaar wanneer ek terugkom. Ek is iemand wat in die oomblik leef en nie ver vooruit beplan nie.

Het werk maklik gekom van daar af?

Ha! Toe ek in 2014 die rol in Binnelanders kry, het ek gedink, I’ve got this. En toe volg ’n groot stilte. Jy sit jouself so daar buite as jy oudisies doen en jy voel daai teleurstelling diép in jou hart as jy nie die rol kry nie. Ek het in kostuumafdelings gaan werk net om op stel te kon wees.

Mila Guy is in haar element as sy toneel kan speel. FOTO Randy January

Wat is die rol van vriende in sulke tye? Jy woon mos in Linden se “Melrose Place”, met ’n spul kunstenaars as bure . . .

Hulle verstaan beslis daai eina! Ons herinner mekaar daar sál weer iets anders kom. En ons help mekaar ook op ander maniere, soos om regie te doen as een ’n video vir ’n oudisie moet instuur. Ek het byvoorbeeld al die kostuumwerk gedoen vir Bennie Fourie, wat langsaan woon, se King Price-advertensies. Ek, hy en Ansu Visser, nog ’n buurvrou, het al saam ’n kortfilm in my kombuis gemaak.

Jou regie-debuut, Die Begin, was in Maart op kykNET. Hoe het dit gebeur?

Dit het begin met daardie einste kortfilm! Ons het dit sommer gedoen om besig te bly tydens die inperking. Ek het die regie gedoen, Ansu het die draaiboek geskryf, en sy en Bennie was die spelers. Dit was net so agt minute lank. Toe hoor ek kykNET is op soek na ’n uur lange film en ek stuur die kortfilm in as my voorlegging. En toe kry ons dit! Ansu het weer geskryf. Dit gaan oor ’n liefdesverhouding, ’n ou wat sy meisie wil vra om te trou. Oor daardie druk in die Afrikaanse kultuur om te trou en kinders te kry. Dis iets wat ek wíl doen, maar jy voel soms daardie druk, asof mense dink jy is niks sonder ’n man nie.

FOTO Leana CR

Hoe raak dit jou dat 7de Laan nou net drie keer per week uitgesaai word?

Die nuus was ’n skok – dis dan so ’n ikoniese sepie. Soveel mense het ’n petisie daarteen onderteken. Ons kontrakte word in Augustus aangepas, so ons kyk maar wat gebeur. Vir nou is ek net dankbaar ek was ’n vryskut voor ek die rol van Lana Basson gekry het, so ek is gemaklik met onsekerheid.

Aktrise Lizz Meiring wil weet: Jy het veral bekend geword vir jou rol in Hotel. Wat is vir jou die belangrikste aspek van komiese spel?

Sjoe, sy vra my vas! Ek weet net toneelspel is lekker en ek doen dit – ek dink nie altyd na oor die tegniese aspekte nie. Komedie, reken ek, gebeur meer in die oomblik – jy moet reageer meer as wat jy die woorde leer. Dit geld in ’n mate drama ook, maar met komedie moet jy meer vrygewig wees teenoor jou mede-akteurs en hulle ruimte gee om hul ding te doen. Veral nou, in die vierde seisoen van Hotel, improviseer ons meer.

Jou ma, Belinda Guy, vra: Jy wou altyd graag sing. Sal jy later weer ’n sangloopbaan oorweeg?

Ek het gedink dis mos nie ’n regte werk nie, werk kan nie pret wees nie, en wou toe geleentheidsbeplanning studeer. Dit was my ma wat gesê het, nee, jy moet drama gaan studeer. Sy het my so ondersteun. Miskien eendag, vir haar, sal ek ’n liedjie opneem.

Op stel van 7de Laan. Mila is gekiek saam met die akteur Andre Lotter, wat die rol van Rikus Welman vertolk. FOTO Instagram / Mila Guy