1. Vertel meer oor jou karakter.

In my kop is Wessel se pad baie soos die van Hansie en Grietjie. Hy is van nature ’n goeie mens. Maar hy word stadig maar seker by die immorele wêreld betrek, die woud verteenwoordig in Hansie en Grietjie. Hoekom hy in hierdie woud ingetrek word is oop vir bespiegeling. Miskien nuuskierigheid, miskien omstandighede, miskien die liefde vir ’n vrou. Maar soos hy dieper in hierdie ‘woud’ inbeweeg het, het hy tog morele krummels in sy spoor gelaat om sy pad weer terug te vind. Soos wat hy die middel van hierdie woud bereik het, was die krummels skielik skoonveld en was hy magteloos. Wanneer hy [sy halfsuster] Annelize 10 jaar later opspoor, het hy uiteindelik sy pad uit hierdie woud gevind. Maar teen water prys? Wat moes hy alles deurmaak om sy pad terug te vind? Watter uitdagings, teleurstellings, dalk selfs tragedies moes hy deurmaak om sy pad uit hierdie woud oop te veg? En ek dink, al is hy nou uiteindelik verlos van die woud, is sy verlossing slegs tydelik en gaan dit nog lank by hom spook.

2. Jy het al in verskeie sepies gespeel. Hoe was dit om in die gange van Binneland te kon loop?

Dit was een groot voorreg. Soos met enige bedryf, wil ’n mens saam met die talentvolste en mees bekwaamste mense werk. En Binnelanders is die toppunt van ons tv-bedryf wat talent en vermoë betref.

3. En watter Binnelanders-karakter fassineer jou die meeste?

Dr. Hugo Vos. Net oor Cobus Rossouw hom so mooi vertolk en weereens bewys, soos sy susters ook al herhaaldelik bewys het, dat die Rossouw-familie se talente geen perke ken nie.

 
Dr. Annelize Roux (Cindy Swanepoel) en haar halfbroer, Wessel Mouton (Eric Bouwer). FOTO Binnelanders

4. Wat is drie goed wat aanhangers nie van jou weet nie?

* Ek is sedert 2002 ’n lid van MENSA - ’n vereniging vir mense met ’n IK wat onder die top-2% in die wêreld val.

* Ek kan die hele The Lion King (1994) uit my kop uit opsê.

* Ek is die grootste Roger Federer-aanhanger onder die son.

5. 2020 was ’n besonderse uitdagende jaar en vir die meeste van ons lê die laaste paar weke soos ’n berg voor ons. Hoe bly jy gemotiveerd?

Maklik, ek hoef net na my liewe ma te kyk. Hoe sterk sy is en wat sy haar hele lewe moes en steeds deurmaak. Sy is al vir 46 jaar ’n parapleeg, nadat sy in ’n ernstige motorongeluk haar rug gebreek het. Hoe sy dit absoluut in haar stride vat en elke dag net voluit leef. Ook as ek aan my ontslape pa dink, wat 6 maande lank vir sy lewe in ’n hospitaal geveg het en nie een oomblik jammer vir homself gevoel het of gekla het nie. Hy en my ma was 44 jaar getroud, toe hy in 2018 oorlede is. So elke dag, as ek wakker word, is ek so dankbaar dat ek met dié twee mense vir ouers geseënd was. Ek is uit die staanspoor gemotiveerd.

6. Enige planne vir Desember? 

Ek gaan bietjie ’n draai maak in Somerset-Wes [Wes-Kaap], om vir familie en vriende te gaan kuier. Maar teen Nuwejaar is ek terug in Pretoria.

 

7. SPEEL SAAM: Jy kan enige drie bekendes oornooi vir koffie. Wie sal dit wees en hoekom?

* Dit sal ’n coin toss tussen Terrence Malick en Stanley Kubrick. Hulle is verreweg die twee intelligenste filmmakers wat konstant die boundaries van metafisika uitdaag en ontdek.

* Søren Kierkegaard. Sy filosofie is die naaste wat ons sal kom om die verstand van God te verstaan, al is ons dan steeds ligjare weg.

* Derdens beslis my Pa. Sodat ek weer met hom kan gesels en ’n stywe druk kan gee. Hoewel hy tegnies nie ’n bekende is nie.

8. Watter opwindende projekte lê voor vir die nuwe jaar? Iets waarop jy kan uitbrei?

Ek is tans om ’n draaiboek te skryf wat op die lewe van Suid-Afrikaner Arnold Taylor, ’n wêreld kapokgewig-bokskampioen, gebasseer is. Dit handel nie net oor sy triomf in die bokskryt nie, maar oor sy innerlike triomf wat hy danksy die liefde en ondersteuning van sy vrou behaal het.


9. My wens vir 2021 is ...

Ek wens nie. Maar ek hoop natuurlik vir kindness en meer verdraagsaamheid.