Hy was twee jaar in die Laan, maar Steyn sal hy vir baie mense bly, lag Ivan. “Ek het nie eens meer hare nie, en steeds, veral op kleiner dorpe, sal ek rondloop en hoor hoe mense sê, ‘Daar’s Steyn! Daar’s Steyn!’. Ek het in 2001 begin, toe 7de Laan ’n absolute fenomeen was. Dit het my ’n ongelooflike platform gegee, veral omdat ek geen formele opleiding as akteur het nie.”

Hy het daarna ook baie bekend geword vir sy rol as Koert in Egoli. In 2019 was hy te sien in die reeks Alles Malan, maar deesdae werk hy baie minder as akteur en het byna meer bekend geword as fietsryer. Hy het al vir liefdadigheidsprojekte van die Kaap na Kaïro gery, en van Beijing na Istanboel.

Ivan saam met Nico Panagio (George in 7de Laan) en Robert Bester (Zac in 7de Laan). Hulle en drie ander ou sterre van die Laan was deur SARIE se modespan gekiek vir ons modeblaaie. FOTO Glen Montgomery van Supernova vir SARIE se Mei/Junie 2021-uitgawe

“Nou sien ek myself net as akteur wanneer ek op stel is. Ek is ook ’n vennoot in ’n maatskappy wat aanvullings verkoop, Happy Joints. Verder is ek maar ’n free spirit. My groot droom is om ’n jaar lank met my karavaan rond te reis.”

Hy is privaat oor sy verhouding met die aktrise Nadia Valvekens, saam met wie hy in die Kaap woon. “Ek, as mens, is gelukkiger as wat ek destyds in my Laan-dae was. Toe was ek eintlik uiters onseker van myself. Nou het ek meer selfvertroue en weet wat my sterk en swak punte is. Ek het ’n kalmte wat nie toe daar was nie. Ek is meer aanvaardend en probeer nie so hard om als te beheer nie.”

Die Kaap dra ook hiertoe by, sê hy. “Ek het verhuis net nadat ek uit die Laan is en die stadiger pas werk vir my. Ek is lief daarvoor om in die buitelug te wees en gaan stap, kampeer en branderry gereeld. Die lewe is eenvoudiger.”

Kry Ivan se uitrusting:

  • “Jogger” met ruitpatroon – langbroek met rekke by soom (R599), JonathanD by Queenspark.
  • Bypassende vlieënierstyl-baadjie (R850), JonathanD by Queenspark.
  • Oranje sweetpaktop (R379), RE. by Woolworths.
  • Grys gebreide mus (R349), Witchery.

GROOTTES Baadjie: S – XL, Broek: S–XL, Sweetpaktop: XS - XXXL