Die aktrise Rehane Abrahams, wat Wendy vertolk, moes gou leer om ’n krokodilvel aan te trek.

“Die grootste uitdaging tot dusver was hoe om die reaksie van die kykers te hanteer,” vertel sy. 

In die begin het die haat vir die karakter, van veral Facebook-aanhangers, haar aangetas. “Maar ek’t geleer om net uit die comments section te bly en my nie te steur aan hoe persoonlik hulle raak nie.”

Sy kry gelukkig nie “woord-houe” en beledigings in supermarkete, sentrums of selfs in die publiek nie. “In my daaglikse lewe lyk ek glad nie soos Wendy nie. Maar mense wat my wel herken is eintlik respekvol en sweet. En ek dra my masker!” 

FOTO SJ van Zyl

Kry sy die karakter eintlik jammer?

“Sy’s gans te gevaarlik om te bejammer ... en te kompleks om jouself voor te ’n vererg. Sy fasineer my.”

Hulle verskil dag en nag, daar is geen ons Wendy in haar nie. Tog, het Rehane steeds iets by haar karakter geleer. “Sy’t baie self-vertroue. Ek hoop ’n bietjie daarvan het erens vasgesit.” 

As sy haarself in vyf woorde moes opsom, sou ‘tee’, ‘bad’, ‘lag’, ‘speel’ en ‘slaap’ hoog aan die lys wees.

Rehane glo jy kan van alles iets leer ... ’n uitdaging, ’n gesprek of selfs ’n wêreldgebeurtenis. Sy klou juis in moeilike tye aan die sielkundige Carl Jung se woorde vas: “We need difficulties; they are necessary for health, personal growth and self-actualization ... ’n Mens kan van alles leer, so the only way out is through.”

En het sy enige opwindende projekte in die pyplyn? “Ek is altyd besig met iets, maar ek is bygelowig en reveal nie graag voor dit tyd is nie. Julle sal maar moet sien. #WatchThisSpace”