Haar huis, haar lewe en haar hart is nou in die Kaap. “Contentedness,” dís hoe Donnalee 2019 tot dusver opsom. “Die jaar is eintlik vol verrassings, oorweldigend, maar op ’n mooi manier.”
Sy is rustig, sy is vergenoegd, sy is sielsgelukkig. “Ek het my lewe lank geweet ek gaan in die Kaap bly.” Dis ook ’n plan wat haar man, Ivan Botha, gekoester het lank voor hul paaie gekruis het. “En toe ons paaie een word, het ons dit saam begin droom.”
Haar jaar het anders uitgedraai as wat aanvanklik beplan is, erken sy. Planne vir ’n vierde rolprent is uitgestel. “Toe het ons tyd! Dis asof die eerste ses maande net vir ons gegee is.” Hulle kon Kaap toe trek, sy kon haar klerereeks The Romantic Collective begin en hulle kon trou.
