Haar karakters is so uiteenlopend soos die Kaap se weer. Sy kan eenklaps in die genre van drama verkeer en ook haar komedie-skoene aantrek. SARIE.com het met haar gesels oor Suidooster en haar permanente rol in dié sepie.

Esther vertolk die rol van die sakevrou Elana Naudé, wat getroud is met die vrygees Susan Naudé (Natasha van der Merwe. FOTO Verskaf deur Suidooster

1. Vertel meer oor jou karakter.

My karakter is Elana Naudé. Sy het haar pad opgewerk in die korporatiewe wêreld en was die kreatiewe direkteur van een van die grootste advertensie-maatskappye in Afrika. In Johannesburg het sy haar lewensmaat en eggenoot, Susan, ontmoet en dié twee het saam besluit om die gejaag na geld vaarwel te roep en af te trek Kaap toe waar hulle ’n kroeg op die strand gaan oopmaak. Elana wil vir haar en Susan ’n standvastige lewe in Ruiterbosch skep met die oog op eendag ’n kindjie ook te kan hê en ’n familie te wees.

 

2. Om in ’n sepie te speel is nie vir sissies nie. Wat het jou aangetrek tot die rol en hoekom het jy besluit om die uitdaging en genre aan te pak?

Dis inderdaad ’n groot uitdaging, maar ook ’n groot voorreg om binne hierdie ongelooflike ondersteuningsraamwerk te kan werk. Suidooster is al in hul 7de jaar op die kassie so mens betreë hier 'n wêreld waar alles werk soos 'n goed geoliede masjien. 


3. Watter karakter uit die Suidooster-wêreld fasineer jou die meeste en hoekom?

Toe ek uitgevind het dat ek die rol gekry het, het ek die sepie reg van die begin af begin kyk. Seisoen Een. Episode Een. En Mymoena het dadelik my hart gesteel. Ek dink die deernis en liefde waarmee Jill haar speel, is beeldskoon.

 

4. Die kunste in Suid-Afrika is hard deur die pandemie getref, veral teater. Wat is jou raad vir iemand wat nou die kunste wil betree of as student drama begin studeer?

Die uitvoerende kunste sal altyd ’n plek he. TV, films was ons redding tydens inperking. Dis wel bitter hartseer dat ons teaters en die kunstefeeste so hard getref word, maar ons sal aanhou hoop dat dit die pandemie oorleef!

 

5. Dis ’n jaar sedert ons in vlak 5-inperking was. As jy terugkyk, wat is die een ding wat jy oor jouself geleer het gedurende hierdie uitdagende tydperk?

Ek dink ek het besef dat ek meer aanpasbaar is as wat ek gedink het. Covid het ons ook nie veel van ’n keuse gegee nie, nê?

 

6. Het jy ’n spesifieke sê-ding of aanhaling wat jou deur moeilike tye dra?

Just FLOW. Wees soos water.