Stilsit was altyd ’n probleem. “Ek het miere in my broek gehad. Op skool was ek die class clown wat altyd in die moeilikheid was.” Al het hy sy onderwysers grys hare gegee, was akademie Christo se sterk punt by die Kairos Senior Sekondêre Skool op Heidelberg in die Wes-Kaap. Hy was veral lief vir tale. Hy het ook krieket en sokker gespeel, maar beskou homself nie as ’n legende op die sportveld nie. “Rugby speel ek tot vandag toe nie! ‘Average’ is ’n gróót woord as dit by sport kom.” Teen die tyd wat hy in matriek was, was hy wel reeds in ’n klomp televisiereekse en toneelstukke te sien.
Hy het LLB aan die Universiteit van Wes-Kaapland studeer, al was hy die naasoudste van ses kinders uit ’n bekende akteursfamilie. “My oupa Goliath [ook ’n akteur] wou nie hê ek moes drama studeer nie. En wanneer hy gepraat het, het almal geluister.” Tog was Christo gedurende sy universiteitsjare gedurig in films of op die verhoog, waar die vervaardigers van 7de Laan hom later raakgesien het.
Sy rol as Errol in dié sepie het sy lewe op sy kop kom keer. Maar al is hy bitter lief vir toneelspel, is skryf sy groot liefde. Onlangs het hy help skryf aan die gewilde kykNET- dramareeks Spoorloos.
